Atuakkiaq kalaallisooq atuffassissutigalugu immiussaq Danmarkimi tunisaanerpaani qulini nr. 1-iusaqattaartoq

Uppernanngikkaluaqaaq, atuakkiap kalaallisuup atuffassissutigalugu immiussap Danmarkimi atuakkani immiussani tunisaanerpaani qulini, sapaatit akunnerini arlalinni, nr. 1-iusaqattaarnissaa.

Kisiannili tamanna salluunngilaq, tassami atuakkiortup Katrine Rasmussen Kielsen-ip atuakkiaa “Qivittuissuit akornanniinnikuuvunga”, Danmarkimi atuffassissutitut immiussatut aamma Nunatsinni atuakkatut atuartarissatut maanna tunisaanerpaanut ilaalersimammat.

“Qivittuissuit akornanniissimavunga” atuakkatut 7500-it sinnerlugit tunisaasimalermat saqqummersitsisuata Katrine Rasmussen Kielsenip naqiterisitsisarfiata Katrinamunap naqiterteqqinnissaa unitsikkallarsimavaa. Ilutigaluguli atuagaq atuffassissutitut immiussaq maanna Danmarkimi atuakkani immiussani tunisaanerpaani bestseller top 10-mi nr. 1-ioqattaarpoq.

Atuakkanik atuffassissutigalugit immiullugit tuniniakkani tunisaqarnerpaanut Katrine Rasmussen Kielsen taamaasilluni akuulerpoq, unammillertigalugit atuakkiortut tusaamasarsuit ass. Leif Davidsen, Jussi Adler-Olsen, Jan Guillou aamma Rane Willerslev.

Kalaallit Atuakkiortut paasisai naapertorlugit atuagaq taanna maanna danskisuunngortinneqarluni nutserneqarpoq (Nordisk Oversættelses Støttemik tapiiffigineqarluni), ukiarulu saqqummersinneqarnissaa ilimagineqarluni.

Kalaallit Atuakkiortut maanna pilersaarusiorpaat ukiaru tamanut ammasumik Nuummi bogcafeqartitsinissartik, Katrine Rasmussen Kielsenillu qaaqqusanut ilaanissaa ilimanarluinnarpoq qaaqqusanut Taama iliortoqarsinnaaneranut oqaloqatigiinnerit aallartereerput, isumalluarfiusumik, taamalu pisoqassappat atuartartuni Nuummiittut Katrinep Rasmussen Kielsenip naapissinnaassavai.

Katrine Rasmussen Kielsenip torrallaarujussuarneranut Kalaallit Atuakkiortut pilluaqquaat, tulluusimaarutigalugulu, kalaallinullu atuartartunut ukiaru ilisaritinneqarnissaa qilanaarilereerlugu.

Kalaallit Atuakkiortut sinnerlugit

Juaaka Lyberth
Siulittaasoq

Ilaasortaarnerup Iluaqutissartai

KA-p siunertai aajuku:

§ 2. Siunertai: Kalaallit atuakkiortut, taalliortut aamma kalaallisuumut nutserisartut kikkulluunniit piginneqqaartussaanermik inatsisitigut illersugaasut tapersersussallugit pisinnaatitaaffiisigullu illersussallugit.
Imm. 2. Ilaasortat soqutigisaat pisariaqartitaallu assigiinngitsut isumagissavai.
Imm. 3. Atuakkiortut, taalliortut kalaallisuumullu nutserisartut sulinerat oqilisaanniarlugu aningaasaateqarfimmik pilersitsissalluni.

Iluaqutissartaa sumiippa?

Suliamik piginnittuuneq

KA-p ukiuni 45-ni atuunnermini atuakkiortup, nutserisup, taalliortullu, assitalersuisartullu suliaminik piginneqqaartuunerata ataqqineqarnissaa illersugaraa. Imaappoq anersaakkut – tigussaanngitsunik kulturikkut pilersitsinermi – piginnittuunerup ataqqineqarluni, aningaasarsiartaqarpallu eqqortumik akilerneqarluni atorneqartarnissaa KA-p suliaani pingaarnerniipput.

Isummersorsinnaatitaaneq

Killilersugaanngitsumik isummersorsinnaatitaanerup oqaaseqarsinnaatitaanerullu illersorneqarnera.

Tassaniipput peqatigiiffeqarnitsigut illersukkavut. Nunatsinni kikkulluunniit killilersorneqaratik isummersorsinnaatitaanerisa (atuakkiorsinnaatitaanerisa) illersortuarneqarnissaa.

Pikkorissaanerit

Taakkua saniatigut peqatigiiffeqarnitsigut nunatsinni atuakkiortarnerup atuarumatussutsillu siuarsartuarneqarnissaat sullisigiuarparput, pikkorissaatitsisarnerit isumasioqatigiissitsisarnerillu aqqutigalugit.

Pikkorissaasarnerit isumasioqatigiissitsisarnerillu ingerlannissaannut aningaasassarsiortarneq aaqqissuunnerilu KA-p siulersuisuisa ingerlattarpaat, ilaasortanullu neqeroorutigisarlugit ilaasortat immikkut aningaasartuuteqaratik peqataaffigisinnaasaat.

Atuagassiamik pisartagaqarneq
KA-mut ilaasortaanernut atatillugu atuagassiaq Kalaaleq ilaasortanut akeqanngitsumik pisartagarilersinneqartarpoq.Pisartagaqarusunngikkaanni tamanna immikkut nalunaarutigineqassaaq.

Peqatigiinneq nukittuunngortitsisarpoq

Kalaallit Atuakkiortut ilaasortaat amerlaneruppata, KA-p suliniutai pisortanit aamma politikerinit tusaaneqarnerunissaat qularinngilarput.

Atuakkiortut, atuakkiorusuttullu tamatta soqutigisaqaqatigiinnerput tassaniippoq.

Oqaluinnartoqarsinnaanngilaq atuakkiorniartarnermi, saqqummersitsisarnermilu pissutsit ajorpallaartut, peqatigiiffimmullu ilaasortaanissaq soqutiginagu.

Aatsaat KA-mi peqatigiikkutta atuakkiornerup silarsuaani pissutsinik ilorraap tungaanut saatitsisinnaavugut.

Atuakkiortut ataasiakkaat KA-mut ilaasortaanermikkut, KA-p isumasioqatigiissitsisarnerini pikkorissaatitsisarnerinilu peqataasarnermikkut sunniuteqaqataasinnaapput ulluinnarnilu siulersuisunik isummersoqateqarsinnaallutik.

Allatat namminersuutigalugu saqqummersinniarukku eqqumaffigisassat pisussaaffiillu pingaarutillit makkuupput:

1) Allatavit imarisaanut tunngasumik avitseqateqarneq pingaaruteqarsinnaavoq.

2) Allatavit aaqqissuisussaanik nassaarnissaq pisariaqarpoq (taanna akissarsiaqartarpoq).

3) Saqqummersitsivissavit pilersinnissaa isumagissavat. CVR-normutaassaatit. Taanna akileraartarnermut aqutsisoqarfimmut piniarneqassaaq.

4) Aqqissuisup allatat nalilersorlugulu aaqqissussavaa. Imarisaata ataqatigiinneranik tamakkiisuuneranillu qulakkeerinninneq pisarpoq. Atuartussanut naleqqunnersoq, ass. meeqqanoortuuppat meeralinnut imalt. pædagogimut, ilinniartitsisumut allamulluunniit nalilersorneqarsinnaavoq.

5) Kukkunersiorneqarnissaa pingaaruteqarpoq, ajornanngippat allataq marloriarlugu inunnit assigiinngitsunit kukkunersiorneqassaaq.

6) Atuagaq titartagartaqassappat titartaasussamik nassaarnissaq, taannalu isumaqatigiissusiorfiginissaa.

7) Ilioqqarnissaa (grafisk opsætning)
a. Neqeroorusiortitsineq

b. (Nammineq titartagartalersuissagaanni titartakkat titartaqqissaarsinnaavai)
c. Piumasaqaatit aalajangigassat:
i. naqinnerit angissusissaat

ii. naqinnerit qanoq ittut (skrifttype)
iii. pappilissat qanoq angitigisut (cm)
iv. saqqassaata tunuatalu isikkussaa
v. qalipaatit il.il.
vi. qanoq ilioqqarneqarnissaa
d. stregkoder grafikerip ilanngussinnaavai

i. ISBN Internationalt Standard Bog Nummer, Danmarks Kontorimut piniagassaapput.

ii. (produkt assigiinngitsut immikkut stregkodeqartarput)

8) Naqiterneqarnissaa
Neqeroorusiortitsineq

a. Ilioqqaasorlu inissereersimasassat:
i. Pappiaqqap qanoq ittuunissaa
ii. Atuakkap angissusissaa
iii. Qassinngorlugu naqiterneqarnissaa
iv. Saqqaata/tunuata qeratasuujunissaa aqitsorluunniit
v. pappiliaq type suna (qillertoq/qillinngitsoq)
vi. qalipaatit: qalipaatilik imalt. qaqortoq/qernertoq
vii. qaqugu piareersimanissaa viii. akilernissaa aamma nassiunneqarnissai
ix. evt. puussiaaqqamik atuakkat qaavatigut pooqassanersut.

b. Naqiterisartut makkuusinnaapput:
i. Clemenstrykkeriet, Danmark
ii. Narayana Press, Danmark
iii. Alla

9) Aningaasaliisussarsiorneq
Neqeroorutit qulaaniittut tunngavigalugit qinnuteqaammi aningaasartuutissanut missingiussaq allanneqassaaq.
b. Isumaqatigiissusiorneq/Forlagsaftale (kiap suna akisussaaffigivaa, aaqqissuisup qaqugu piariissavaa, kukkunersiusisussap qaqugu naatsorsuutigissavaa, qanoq suliarineqassava il.il.) ilanngunneqarsinnaapput.
c. Qinnuteqarfigisinnaasat:
i. Tips & Lotto Midler (Namminersorlutik Oqartussat)
ii. Nunafonden
iii. Kommuneqarfik Sermersuumi Sermeq fonden
iv. Sumiiffigisami Rotary Club
v. Suliffeqarfiit il.il.

10) Tuniniaanissaq aamma siammarterinissaq

a. Tuniniaariaaseq
i. Atukkap akissaanik aalajangiussineq isumagineqassaat
ii. Tuniniaaqqittussat immikkut neqeroorfigineqartarput

b. Neqerooriaatsit assigiinngitsuusinnaapput (assersuutit)
i. A: 50-it pisiarigussigit ataaseq ima akeqassaaq
ii. B: 100-inik pisigussi ima ataaseq akeqassaaq (Produktet pris, vejledende pris.)
iii. Eqqaamallugu: varenummer/produktnummer

11) Atuagaq saqqummerpat sumi arlaanni malunnartitsineq, atuakkamut suleqataasimasut qaaqqullugit.

12) Tusagassiorfinnut nalunaarutinik allanneq nassiussuinerlu

13) Tunisat aallaavigalugit akileraaruseriffimmut nalunaarusiornissaq

14) Nammineq atugassamik ukiumoortumik nalunaarusiorneq

15) Groenlandicamut atuakkanik pingasunik tunniussinissaq

16) Aningaasaliisimasunut nalunaarusiornissaq piumasaqaataasunillu allanik naammassinninnissaq